Ubuzima bw’abantu batandukanye akenshi bugaragara nk’aho ari bwiza iyo urebeye inyuma. Tubona abantu baseka ku mbuga nkoranyambaga, tukababona bishimira ibyo bagezeho, ariko inyuma y’ibyo bigaragara tubona, hafi ya buri wese aba yikoreye umutwaro, afite ibibazo n’intambara zitaboneka arimo kurwana kandi atajya avuga. Igitangaje nuko abantu hafi ya bose baba bafite ibibazo bene nk’ibyo ariko batajya bavuga.
Ibyo bibazo kandi ntibiba ari ibintu wenda bihambaye, ahubwo aba ari ibibazo byihishe mu tuntu dutoya kandi abantu bose babihuriraho. Akenshi usanga abantu bafite utubazo nko kuba bahorana umubabaro w’ikintu runaka kitagenda neza, stress zihoraho zo kuzuza inshingano n’ibyo abandi baba badutegerejeho, cyangwa se nk’agahinda umuntu agira akumva asa n’aho ari wenyine kandi ari kumwe n’abandi.
Hari benshi bicecekera ariko bafite ibibazo by’amafaranga, ubwoba bw’indwara, intimba mumutima iterwa n’urukundo cg imibanire hagati y’inshuti ye cg uwo bashakanye. Nubwo bitagaragara, ibyo bibazo bigira uruhare mu buryo tubaho no mu buryo twiyumva.
Impamvu abantu benshi batavuga ibyo barimo guhangana nabyo, ni ubwoba bw’uko abantu babacira urubanza. Akenshi mu myumvire y’abantu habaho kwihagararaho akumva ko kwemera akavuga ngo “ndahangayitse” cyangwa “ntabwo merewe neza” akumva bishobora gufatwa nko kwiyambura agaciro, cyangwa bikaba byatuma abantu bamuhindukirana. Kubw’ibyo, umuntu agahitamo gushyiraho “mask”—Guhisha ukuri ahubwo akaba yaseka akerekana ko yishimye muri ako kanya.
Ese birakwiye guceceka ikibazo? Guceceka bifite ingaruka: bituma twiyumva ko turi twenyine, nk’aho ari twe bonyine tugira ibyo bibazo.
Ariko ukuri ni uko buri wese aba afite ibibazo ahura nabyo bimeze nk’ibyo nawe uhura nabyo. Umukozi mugenzi wawe ugaragara nk’ufite icyizere gihanitse ashobora kuba arwana na depression. Inshuti yawe ikunda gusetsa buri wese ishobora kuba iri mu gahinda k’ibyo yabuze. Umunyeshuri uhora atsinda amasomo ashobora kuba atwaye umutwaro w’ibibazo byo mu rugo. Rero, jya wumva ko utari wenyine, kandi ufungukire inshuti zawe uzibwire kuko ntabwo ari wowe wenyine uhura nabyo.
Gusa nanone, n’ubwo wabwira abantu ibibazo ufite, si byiza kubibwira isi yose. Bitangirira mu byoroheje: kwiyegereza inshuti wizera, ukayibwira, wakumva bikomeye ugashaka ubufasha ku baganga babifitiye ubushobozi.
Ibibazo duhura nabyo ntibigomba kuduherana ngo twumve ko ntagaciro dufite, ahubwo kwemera ko turi guca muri ibyo bibazo no kubyakira ni intabwe yo kugarura icyizere. Mu buzima tuzahora duhura n’ibibazo, ariko iyo tumenye ko ibibazo biri rusange, uwo mutwaro uratworohera.
